24 маусым күні облыс әкімі Берік Уәли жұмыс сапарымен Бородулиха ауданына келді. Сапары барысында Ә.Бөкейхан атындағы қазақ орта мектебінде аудан халқымен жүздесіп, тұрғындарды жеке мәселелері бойынша қабылдады. Сонымен қоса, Бородулиха колледжінің жұмысымен танысты.
Облыс әкімі аудан орталығы Бородулиха ауылында өңірдің әлеуметтік-экономикалық дамуы және алдағы жоспарлар туралы халыққа есеп берді. Бұл – аймақ басшысының аудандардағы алғашқы есептік кездесуі.
Жиында алдымен аудан әкімі Айдар Ибраев Бородулиха ауданының 2024-2025 жылдардағы әлеуметтік-экономикалық даму көрсеткіштері мен алдағы жоспарлар туралы баяндама жасады.
Одан соң облыс әкімі өңірді дамытуға бағытталған жұмыстар туралы баяндап, әлеуметтік-экономикалық көрсеткіштерге тоқталды. Аймақ басшысы жол, ауыз су, жарықтандыру, тозығы жеткен әлеуметтік нысандар, мектептердегі орын тапшылығы, медицина, мәдениет және интернет мәселелері халыққа ең қажетті әрі шешімін күткен істер екенін атап өтті.
«Тағайындалған күннен бастап барлық аудан, қалаларда, оның ішінде шалғай ауылдарда, бұрынғы аудан орталықтарында болдым. Халықтың мұң-мұқтажын тыңдап, маңызды мәселелерді Мемлекет басшысына баяндадым. Ел Президенті Қасым-Жомарт Кемелұлы қордаланған түйткілдерді кезең-кезеңімен шешу қажеттігін атап өтті. Осы бағытта Үкіметпен бірлесіп кешенді жұмыстарды қолға алдық», – деді облыс әкімі.
Аймақ басшысы облыс экономикасының барлық саласында оң өсім бар екенін айтты. Өткен жылы жалпы өңірлік өнім көлемі 3,2 трлн теңгеге жетіп, 4,3% өсім көрсеткен.
Жылу және ауыз су жүйелерінің тозуы, жолдардың сапасы, әлеуметтік нысандардың жағдайы – облыс әкімінің назарындағы негізгі мәселелер қатарында. Биыл 26 ауыз су жобасы іске асырылады. 358 шақырым жол жөнделеді. Сондай-ақ 1140 пәтер сатып алынып, халықтың әлеуметтік осал топтарына беріледі. Бородулиха ауданында 48 пәтер тұрғындардың игілігіне тапсырылмақ.
Переменовка ауылында су желілерінің құрылысы, Камышенка ауылында клуб салу, Петропавловкада спорт-сауықтыру орталығының құрылысы және Зенковка, Белағаш, Новопокровка, Петропавловка ауылдарында алғашқы медициналық көмек нысандарына күрделі жөндеу жұмыстары жүргізілетіні айтылды. Биыл Жаңа Шүлбі ауылындағы арнаулы әлеуметтік қызметтерге мұқтаж балаларды қолдау орталығы ғимаратының шатырына, қазандығына және жылу жүйесіне ағымдағы жөндеу жұмыстары жасалады.
Облыста білім беру мен денсаулық сақтау нысандарына ерекше көңіл бөлінуде. Аймақ басшысының айтуынша, өңір мектептерінің 64-і бейімделген ғимараттарда орналасқан. 3 мектеп апатты жағдайда. Алдағы үш жылда 75 мектепті реновациядан өткізу жоспарланған. Биыл 9 мектепке жөндеу басталады.
Ерекше атап өтерлігі, облыс әкімінің тапсырмасына сәйкес Бородулиха ауданының Әлихан Бөкейхан атындағы қазақ мектебіне жаңа автобус, ғимараттың терезелеріне жөндеу жұмыстарын жүргізуге қаражат қарастырылып жатыр. Ауданның 11 мектебіне интерактивті панельдер мен пәндік кабинет сатып алуға 21,9 млн.теңге бөлініп отыр. Алдағы үш жыл ішінде Бородулиха ауданындағы Буркотово, Андроновка, Песчанка ауылдарында медициналық-санитарлық көмек нысандарын салу үшін қаражат бөлу мәселесі қарастырылып жатыр.
«Аудандағы ең өзекті мәселенің бірі – жол. Аудандағы жолдарды рет-ретімен жөндейміз. Кейбіреуін биыл, кейбіреуін келесі жылы бастаймыз. Бородулиха ауданының медицина, мәдениет, спорт саласындағы қажеттіліктерінің барлығын бюджетке енгізіп, кезең-кезеңімен шешетін боламыз», – деді аймақ басшысы.
Шалғай елді-мекендердегі науқастарға ыңғайлы болу үшін былтыр Ақсуат ауданында гемодиализ орталығы ашылды. Биыл Бородулиха ауданында қосымша 1 гемодиализ орталығын салу жоспарлануда.
«Ауданға осымен үшінші мәрте келіп отырмын. Бұл аудандағы барлық өзекті мәселелерді, халықтың өтініштерін, арыз-шағымдарын, ұсыныстарын үнемі бақылауда ұстап отырамын. Бородулиха – облыс орталығына жақын орналасқан, ауыл шаруашылық әлеуеті өте жоғары аудан. Қарағайлы орман да осы ауданның аумағында. Ауданды дамыту бағытындағы жұмыстарды алдағы уақытта да жалғастырамыз», – деді облыс әкімі.
Кездесу соңында тұрғындардың ұсыныс-пікірлері тыңдалып, сұрақтарға жауап берілді. Аймақ басшысы өңірді дамыту бағытындағы бастамалар жалғаса беретінін жеткізді.
Облыс әкімі Бородулиха ауданына жұмыс сапары барысында тұрғындарды жеке мәселелері бойынша қабылдады. Қабылдауға келген азаматтар жолдарды жөндеу, көшелерді жарықтандыру, мәдениет және спорт нысандарының құрылысы, абаттандыру мәселелерін көтерді.
Атап айтқанда, тұрғындар Бақы ауылдық округіндегі «Ауыл–Коростели», «Новопокровка–Белағаш» бағытындағы жолдарды жөндеу, Ауыл станциясындағы көшелерді жарықтандыру, Бородулиха ауылындағы бірқатар көшелерге асфальт төсеуге қатысты ұсыныстарын айтты.
Жерновка ауылында Мәдениет үйі мен Жаңа Шүлбі ауылында жетім балаларға арналған интернат аумағында жабық хоккей алаңын салу және Петропавловка ауылының ішіндегі көше жолдарын жөндеу секілді ұсыныстар да назардан тыс қалмады. Аймақ басшысы тиісті басқармаларға нақты тапсырмалар берді.
Азаматтарды қабылдау барысында облыс әкімі әр мәселені жеке бақылауына алып, тұрғындар көтерген өзекті мәселелерді кезең-кезеңімен шешуді жауапты сала басшыларына жүктеді.
«Қабылдауда Бородулиха ауданының тұрғындары тарапынан көтерілген мәселелердің барлығымен жақсы таныспын. Биыл 20 шақырымды құрайтын «Новопокровка-Белағаш» жолының 10 шақырымына орташа жөндеу жүргіземіз. Қалған бөлігін келер жылы жөндеу жоспарымызда бар. Сондай-ақ биыл аудан орталығындағы үш көшеге асфальт төселеді. Қалған көшелерді келесі жылдың жоспарына енгіземіз. Осылайша аудандағы мәселелерді кезең-кезеңімен шешетін боламыз. Менің жеке бақылауымда болады», — деді аймақ басшысы.
Облыс әкімінің азаматтарды жеке мәселелері бойынша қабылдауының алдында басқарма басшылары аудан тұрғындарын қабылдап, сауалдарына жауап берді.
Сонымен бірге, аймақ басшысы жұмыс сапары аясында Бородулиха колледжінің тыныс-тіршілігімен танысты. Оқу орнының негізі 2007 жылы қаланған. Колледж 2012 жылы жұмысын бастаған. Қазіргі уақытта мұнда 167 студент білім алып жатыр. Оқу процесін қамтамасыз ететін 52 қызметкер жұмыс істейді. Оның ішінде 16 педагог пен 6 өндірістік оқыту шебері бар.
Колледж типтік емес ғимаратта орналасқан. Оқу орны 10 жеке ғимараттан тұрады. Колледж аумағында 49 орындық жатақхана, 150 орындық асхана, медициналық пункт, кітапхана, 12 оқу кабинеті, 3 өндірістік шеберхана және зертхана бар. Сонымен қатар, техникаларға арналған гараждар қарастырылған. Білім беру мекемесі заманауи бейнебақылау жүйесімен жабдықталған және жеке автономды қазандығы бар.
Бородулиха колледжінде студенттер бірнеше бағыт бойынша білім алуда. Атап айтқанда, тамақтандыруды ұйымдастыру, ауыл шаруашылығын механикаландыру, дәнекерлеу ісі және орман шаруашылығы. Колледждің негізгі бағыты – ауыл шаруашылығы саласына қажетті мамандарды даярлау. Білім ордасы 16 кәсіпорынмен серіктестік орнатқан. Түлектер өндірістік тәжірибеден осы кәсіпорындар базасында өтеді. Бұл олардың шеберлігін шыңдап, болашақ мамандығы бойынша тәжірибе жинақтауына мүмкіндік береді. Соның нәтижесінде колледж түлектерінің жұмысқа орналасу көрсеткіші 100%-ды құрап отыр.
Колледж басшылығы облыс әкіміне 1988 жылы салынған оқу корпусы мен әкімшілік ғимаратқа ағымдағы жөндеу қажеттігін жеткізді. Ғимараттағы су жүйесі де ескірген және жаңартуды қажет етеді. Сонымен қатар, жаңа жатақхана салу мәселесі де айтылды. Аталған мәселелерді шешу мақсатында қажетті жобалық-сметалық құжаттар әзірленген. Колледж ұжымы жөндеу жұмыстарына қолдау көрсетуді сұрады.
Аймақ басшысы колледждің техникалық және ауыл шаруашылығы салаларына қажетті маман даярлаудағы маңызын атап өтіп, оқу орнының материалдық-техникалық базасын жаңартуға қолдау көрсетілетінін жеткізді. Сондай-ақ жатақхананың ескі екенін ескеріп, жаңа ғимарат салынатынын айтып, тиісті құжаттарды дайындауды тапсырды.
«Бүгінгі таңда еңбек нарығына сай білікті маман даярлау – біздің негізгі басымдықтарымыздың бірі. Бородулиха колледжі ауыл шаруашылығы, оның ішінде орман шаруашылығы саласына қажетті жұмысшы мамандарды дайындап келеді. Бұған дейін Үржар, Жарма, Ақсуат, Бесқарағай аудандарына барғанымда ондағы колледждердің жұмысымен танысқан болатынмын. Білім ошақтарының сұранысын ескере отырып, кезең кезеңімен, жүйелі түрде қолдау көрсетеміз», – деді облыс әкімі.
Абай облысы әкімінің баспасөз қызметі
