Биыл еліміздің мерекелік күндердің тізбесі «Аналар күні» және «Әкелер күні» мерекелерімен толықты. Осылайша, мамыр айының екінші жексенбісі «Аналар күні» болып белгіленді. Мемлекет басшысы Қасым-Жомарт Тоқаев: «Берекелі әрі бақытты отбасы қуатты елдің тірегі», – деген болатын. Дана халқымыздың «Отан отбасынан басталады» деген сөзінің мәні тереңде жатқандай.
Ұрпағын өрбітіп, бүгінде мәуелі бәйтерекке айналған көнекөз қарияларымыз тағылым мектебі іспетті. Бородулиха өңіріндегі өз балаларының ғана емес, ауылдың анасына, әжесіне айналған абыройлы жандардың бірі – Шампану Сүлейменова.
Шампану апа 1949 жылы 1 мамырда Бородулиха ауданында туған. Сәби күнінде отбасымен Абай ауданына қоныс аударыпты.
-Балалық шағым Абай ауданында өтті. Мен – қойшының қызымын. Әкем мал бағып, ата кәсіпті дамытты. Үйдің тұңғышы болдым. Анам 7 рет құрсақ көтергенімен, әлем аждаһасына айналған полигонның кесірінен деп болжаймыз, 3 нәрестесі шетінеп кетті. Соғыстан кейінгі кезеңде туғандықтан болар, бала күнімізде көп қиыншылық көрдік,- деп балалық шағын еске алған Шампану әже әке жолын жалғап, саналы ғұмырын ауыл шаруашылығын дамытуға арнағанын айтты.
Әже 1966 жылы Бородулиха ауданының тумасы Дүйсетай Сүлейменовқа тұрмысқа шығыпты. 1937 жылы өмірге келген Дүйсетай Садықұлы тыл еңбеккері. Бұғанасы қатпаған бала соғыс жылдарында ауылдағы аналары сауған түйенің сүтін Белағаш ауылындағы теміржол бекетіне апарып, жеңісті жақындатуға үлес қосқан. Жастайларынан қара жұмысты қайыспай көтеріп, бейнетке белшеден батқан Дүйсетай ата мен Шампану әже бүгінде үлкен әулетке айналды. Әлемнің жарығын сыйлаған 6 перзенттері өмірден өз орындарын тауып, ұл ұяға, қыз қияға қонған. Бақытын баладан тапқан ата-ана 15 немере сүйіп, ата-әже атанған. Еңбекқор жандар «Дүйсетай» шаруа қожалығын құрып, балаларын да мал шаруашылығына баулыды. Ұрпақтарын елжандылыққа, ұлттық құндылықтарды құрметтеуге, салт-дәстүрімізді сақтауға тәрбиелеген қазыналы қарттар өмірдің басты құндылығы бейбітшілік екенін тілге тиек етті.
-Басты байлық – бейбітшілік. Қаншама ауылдастарымыз, ағаларымыз соғысқа аттанып, оралмаған. Соғыстан кейінгі кезеңде өмір сүріп, қиыншылықтың не екенін көрдік. Сондықтан Тәуелсіздіктің қадірін білеміз және ұрпақтарымыз бейбіт аспан астында бақытты да баянды ғұмыр кешсін деп тілейміз. «Аналар күнін» атап өтіп отырғандығымыздың өзі бейбітшілік жемісі. Ана — әрбір адамның жарық дүниедегі ең жақыны, жанашыры, қадірлісі, қамқоршысы, аяулы жан. «Әке баласын тәрбиелейді, ана ұлтты тәрбиелейді» деген аталы сөз бар. Анаға жүктелер жауапкершілік жүгі де ауыр. Әлемдегі барлық аналар бақытты болсын, сәбилердің ұйқысы тыныш болсын, әрбір нәзік жанды перзент сүйіп, бала бақытына кенелсін деп тілеймін,- деді аяулы ана.
Қазыналы қариялар бүгінде кенжелері Шыңғыс пен келіндері Қарлығаштың қолында тұрып жатыр. Өнегелі өмір иелері ауылдың абройына, ақылшысына айналған. Шампану әжедей ұрпақ тәрбиесіне үлес қосқан қыз-келіншектер көп болсын деп тілейміз.
Ай-Керім СӘРСЕНҚАЛИ,
«Жаңа уақыт»
