Мемлекеттік қызметші – халық пен билік арасындағы алтын көпір. Еліміздің өркендеуі, дамуы, мемлекеттік қызметшілердің отансүйгіштігіне, білімі мен біліктілігіне байланысты. Себебі, мемлекеттің саясатын іске асыратын мемлекеттік қызметкер, ал мемлекеттік қызметтің мәртебесі мен беделі мемлекеттік қызметшілерге тікелей байланысты. Сол себепті де қоғамда оларға үлкен міндеттер жүктелген. Мемлекеттік қызметшінің жұмысы білімділік пен іскерлікті ғана емес, үлкен жауапкершілікті де талап етеді.
Бородулиха ауданында мемлекет мүддесіне қызмет етіп жүрген мемлекеттік қызметшілердің бірі – Ертай Шакенов.
Ертай Зенелғазыұлы 1984 жылы 21 маусымда Семей облысы, Жаңасемей ауданының Ново-Покровка ауылында туған. 2001 жылы Камышенка орта мектебін бітірген соң Семей қаласының Шәкәрім атындағы мемлекеттік университетіне түсіп, 2006 жылы «Ветеринариялық санитария» мамандығы бойынша тамәмдаған. Қолына диплом алған жас маман туған өлкеге оралып, «Е.Зайтенов» шаруа қожалығына мамандығы бойынша мал дәрігері болып орналасады. Алайда, мемлекеттік қызмет азаматтық ұстанымын, қоғам игілігіне бағытталған қызметін көрсетуіне мүмкіндік беретінін ескерген ол қызметін ауыстырған. Әуелі 2007 жылы 54770 әскери бөліміне мерзімді әскери қызметші болып орналасып, Отанға адал қызмет еткен. Араға бір жыл салып Новопокровка ауылдық округі әкімі аппаратының маманы болып орналасқан. Бұл ауылдық округте жетекші маман, бас маман лауазымдарында еңбек еткен ол 2014 жылы Бородулиха ауданының ауыл шаруашылығы және ветеринария бөлімінің бас маманы болып ауысты. Жаңа жұмыс орнында да ұйымдастырушылық қабілетімен, зор жауапкершілігімен көзге түскен Ертай Шакенов сектор меңгерушісі, бөлім меңгерушісі қызметтерін атқарды. 2020 жылы Новопокровка ауылдық округінің әкімі лауазымына тағайындалып, бүгінгі күнге дейін жауапкершілік жүгін абыроймен атқаруда.
-Мемлекеттік қызметші болу – үлкен жауапкершілік жүктейді. Қызмет кәсіби білімді, біліктілікті талап етеді, сол білімді іс жүзінде қолдана білу де керек. Сонымен қоса, адалдық, отаншылдық, белсенді өмірлік ұстаным мемлекеттік қызметшінің жемісті еңбегіне жол ашатын қасиеттер. Ауыл әкімі ретінде инфрақұрылымды дамыту арқылы тұрғындардың өмір сүру сапасын арттыруға тырысамыз. Жол, жарық, сумен қамту, абаттандыру мәселелері назардан тыс қалмайды,- дейді кейіпкеріміз.
Ертай Зейнелғазыұлы басшылыққа тағайындалғалы округте бірқатар жобалар жүзеге асты. 2021 жылы «Ауыл – ел бесігі» бағдарламасы бойынша екі жоба қолға алынды. Новопокровка ауылындағы жолдарды жөндеуге қаржы бөлініп, 2,6 шақырымға асфальт жабыны, 10,65 шақырымға қиыршық тас жабыны төселді. 6 көше жарықтандыру тірегі, 160 шам орнатылды. Су тасқынына қарсы іс-шаралар аясында жыл сайын Жура өзенінің арнасын тереңдету жұмыстары жүргізілетіндігін де айта кетуге болады.
— Биыл кентішілік жолдарды ағымдағы жөндеу, Новопокровка ауылдағы сумен жабдықтау желілерін қайта жаңарту жобасы іске асырылуда. Алдағы уақытта Новопокровка ауылында халықтың әлеуметтік осал тобына арналған бес үй салу, Сарноғай, Қарағайлы, Новопокровка ауылдарында көше жарығын орнату жоспарда бар,- деді Е.Шакенов.
Адалдық пен әділдікті ту еткен Ертай Шакенов әр істі үлкен жауапкершілікпен атқаруға тырысады. Қызметте ел ықыласына бөлене білген әкім үйде үш перзенттің әкесі, асыл жар. Жақсы әке қандай болуы керектігін сұрағанымызда:
-Әке мейірімді, бірақ сонымен бірге қатал болуы керек. Балаларына қамқорлық танытып, қолдай білуі аса маңызды. Қыз-ұлдарыма ең бірінші әділдікті, адалдықты, кішіпейілділікті үйретемін, отаншылдыққа тәрбиелеймін,- деді ардақты әке.
Ертай Зейнелғазыұлын ауылдастары салауатты өмір салтын насихаттайтын спортшы қатарынан екенін мақтанышпен айтады. Сондықтан да болар, округ аумағында салауатты өмір салтын дамытуға ерекше көңіл бөлінеді. Елдің басты капиталы дені сау халқы екенін ескерсек, патриот әкімі, бірлігі бекем халқы, спортсүйер тұрғындары барда бұл округ дами түспек.
Айкөркем МАҚЫШ,
«Жаңа уақыт» 