Шекара маңындағы ынтымақтастық аясында 2025 жылдың 8 тамызында Бородулиха ауданының Достық үйі мен арнаулы әлеуметтік қызмет көрсету орталығы Ресей Федерациясының Алтай өлкесіне қарасты Угловское ауданында «Абай мұрасы – мәңгілік даналық» атты ерекше АРТ-жобаны ұсынды.
Іс-шара ұлы ақын Абай Құнанбайұлының шығармашылығын насихаттауға және қазақ мәдениетінің бай қырларын көршілес ел жұртшылығына танытуға бағытталды. Бағдарлама барысында Абайдың өлеңдері оқылып, ақын мұрасынан сыр шертетін түрлі көрме қойылды.
Көрмеде ерекше қажеттіліктері бар балалардың Абай шығармалары желісі бойынша жасаған туындылары, суретші-әуесқой Любовь Ивановна Кириченконың картиналары және ұлттық дәстүрлер мен тағамдар ұсынылды. Қатысушылар қазақ дастарханынан дәм татып, ұлттық мәдениетпен жақын танысуға мүмкіндік алды.
Іс-шара соңында Угловское ауданы әкімшілігінің жылы қабылдауы мен қолдауы үшін естелік сыйлықтар табысталды.
Өз тілшіміз