Абай облыстық Дін мәселелерін зерттеу орталығының мамандары Бородулиха ауданына жұмыс сапарымен келіп, жергілікті тұрғындармен «Дін және қоғам» тақырыбында бірқатар кездесулер өткізді.
Шараның негізгі мақсаты — халық арасында діни сауаттылықты арттыру, радикалды ағымдардың алдын алу және қоғамдағы рухани тұрақтылықты нығайту.
Кездесулер ауылдық округтер мен білім беру ұйымдарында ұйымдастырылып, түрлі жас санатындағы азаматтарды қамтыды. Орталық мамандары қатысушыларға дін мен дәстүрдің сабақтастығы, қазіргі діни ахуал, теріс діни ағымдардың белгілері мен олардан қорғану жолдары туралы кеңінен ақпарат берді.
— Бүгінгі таңда ақпарат ағыны өте жылдам. Осы орайда, жастарымыздың діни білімді ғаламтордан емес, ресми көздерден алуын қамтамасыз етуіміз қажет. Бұл — қоғамның қауіпсіздігі үшін маңызды, — деді түсіндіру тобының мүшесі.
Екі күндік жұмыс аясында барлығы 9 кездесу өткізіліп, оларға 235 адам, соның ішінде жастар, білім беру, мәдениет және жергілікті өзін-өзі басқару салаларының өкілдері қатысты.
Кездесу барысында тұрғындар өздерін мазалаған сұрақтарын қойып, мамандардан тұшымды жауап алды. Ашық форматтағы әңгіме-дүкен барысында дінге қатысты түрлі стереотиптер мен түсініспеушіліктердің себебі талқыланды.
Кездесуге қатысқан тұрғындар дін саласындағы ақпараттық-түсіндіру жұмыстарының маңыздылығын атап өтіп, осындай кездесулер жиі өткізіліп тұрса деген ниеттерін білдірді. Дін мәселелерін зерттеу орталығының мамандары өз кезегінде ақпараттық жұмыстың тек бір реттік емес, жүйелі түрде жүргізілетінін, бұл бағыттағы шаралар Абай облысының барлық аудан-қалаларын қамтитынын жеткізді.
Айта кетейік, Абай облыстық Дін мәселелерін зерттеу орталығы бұған дейін де өңірдің бірнеше ауданында ақпараттық-түсіндіру жұмыстарын жүргізіп, діни тұрақтылықты қамтамасыз етуге бағытталған шараларды жүйелі түрде ұйымдастырып келеді.
Ай-Керім СӘРСЕНҚАЛИ,
«Жаңа уақыт»
