Білім беру қызметкерлерінің ардагерлер кеңесінің ұйымдастыруымен ардагер ұстаздар арасында облыстық «Ұрпаққа аманат» атты эссе жазу онлайн-байқауы өтті. Ұлттық құндылықтарды дәріптеу, рухани мұраны жаңғырту, аға ұрпақтың өмірлік тәжірибесін кейінгі ұрпаққа үлгі ету мақсатында қолға алынған байқауға Бородулиха ауданының ардагер ұстаздары қатысты. Жұмагүл Жакенова І орын алса, Сайлауғайша Әлімбаева ІІ орын иеленді. Ал Зейнеп Каирова «Тіл жанашыры» аталымына ие болды. Ардагер ұстаздарымызды марапаттарымен құттықтай отырып, Сайлауғайша Оралбайқызының байқауға ұсынған эссесін назарларыңызға ұсынамыз.
Редакциядан
Сәлеметсің бе, бақытты ұрпақ! Иә, сен бақыттысың. Себебі, қойнауы құтқа толы ұлан байтақ жерің бар, «жаным арымның садақасы» деп, біреудің ала жібін аттамаған, жетімін жылатпаған, жерінің шетін жауға бастырмаған, бақытын адал еңбектен тапқан «қазақ» деген дана халқың бар.
Қолға қалам алудағы мақсатым: келер ұрпақ, сендер, сол ата-бабасының өткен өмір жолын тереңірек білсін, жақсы істерінен ғибрат алып, болашағына бағдар жасасын деген ой. Олардың алты малтаны азық етіп, соғыстың, аштықтың, түрлі саяси нәубеттердің бар қиыншылығын басынан өткерсе де, ел бірлігін, берекесін сақтаған тағдыры мен тауқыметін, адами болмысы мен кесек мінездерін, қарапайым даналығын ұрпаққа жеткізу. Бабаларымыз аттың жалы, түйенің қомында жүріп-ақ тұлпар мініп, ту ұстаған. Жауға жанын берсе де жерін бермеген. Бүгінде,сол ғасырлар бойғы бабалар арманы орындалып, тәуелсіз ел болдық. Қазақтың басына бақ қонды. Тәуелсіздік-қасиетті ұғым! Біздің осы бақытты, бейбіт өміріміз үшін олардың жасаған жанқиярлық ерлік істері мен ерен еңбектері, адамдық биік тұлғалары мақтаныш сезіміне бөлейді, ертеңге бағыт, бағдар береді.
Ұрпағым! Тарих өткен өмірді сөз еткенмен бүгінге және болашаққа қызмет етеді. Ол – өміртанудың ұлы мектебі. Өткенге көз жібер, тарихыңды таны, одан кейін заман ағымына қарай жаңаша ойла дегім келеді. Тек, жаһанданудың илеуінде кетпей дәстүр салтымызды, қазақы қалпымызды сақтап, ұлттық болмыс, рухани асыл қасиеттерден ажырап қала көрме. Тарихтың қатпар-қатпар тереңінен бастау алып, уақыттың не бір сұрапылында шашылып төгілмей бізге жеткен асыл мұрамыз бар. Ол – халықтың тілі, ділі, әдет ғұрпы, салт дәстүрі. Бүгін заман өзгерді. Өзгермейтін бір-ақ нәрсе бар. Ол – адам бойындағы асыл қасиет адами құндылықтыр. Ол- мейірім, махаббат, әділет, қанағат, инабат, рахым, адалдық, имандылық. Әр адам осы имани қасиеттерді бойына жинақтап өссе, қазіргі қоғамда көрініс тауып жүрген кейбір жат қылықтар мен қатыгездіктен ада болар ма еді.
Әлем әрқашан жаңалыққа толы. Ғаламтор арқылы неше түрлі жағымсыз ақпараттар жастардың санасын улауда. Әлеуметтік желілерде ақпараттық шабуыл жасаушылар, адамды албаты даттаушылар көрініс табуда. Діни фанатизм мен алаяқтық әрекеттер де көп. Сақалы беліне түскен сақалдылар мен бет аузын тұмшалап қара жамылған қыздарды жиі кездестіретін болдық. Бұлар теріс діни ағымдағы ақпараттарға иланып, адасып жүрген жастар. Бұл біздің ұлттық санамызға да ұлттық дәстүрімізге де мүлде сәйкес келмейді. Қазақ қыздары ешқашан бетін бүркеп, қара жамылмаған. Қара жамылуды қайғы қасіретке, жаман ырымға балаған.
«Білектей арқасында өрген бұрым,
Шолпысы сылдыр қағып ,жүрсе ақырын.
Кәмшәт бөрік,ақ тамақ қара қасты,
Сұлу қыздың көріп пе ең мұндай түрін»- деп, жырлаған ұлы Абай. «Қыз өссе -елдің көркі»деп, олардың ақылына, көркіне, нәзіктігіне сүйсінетін халқымыз қыздарына алтыннан алқа, күмістен шолпы соқтырып, торқадан қамқа, жібектен көйлек кигізіп, аялап өсірген.
Қазақ жігіттері сусардан бөрік, құндыздан ішік, былғарыдан оюлы етік киген. Жасына қарамай ақылы асқанды аға тұтқан, ізеттіні іні көрген. Әдептен аспаған, дәстүрден озбаған. Аманатқа қиянат жасамаған.
Ұрпағым! Еліміздің ертеңі – сендерсіңдер. Тәуелсіз еліміздің тағдыры сендердің қолдарыңда. Сендерге тек батылдық, әділдік, қырағылық жарасады. Ғасырлар бойы сақтап келген ұлан байтақ жерімізді, ұлттық құндылықтарымызды көзінің қарашығындай қадірлеп, оны келер ұрпаққа жеткізу- әрбір адамның азаматтық борышы. Ол енді – саған аманат.
Білім ал, еңбекті сүй, бақытты, дәулетті бол. Бар болу, дәулетті болу заман үрдісі. Бірақ, адамның кеудесінде иманы кәміл, пейілі таза болмаса, ол байлық тәкапарлыққа, дүниеқоңыздыққа апарары сөзсіз. Ақша, байлық қуып, халық несібесін қымқырып, қылмысқа ұрынып жатқандар қаншама. Ондайдан сақ бол, ұрпағым. Оңай олжамен келетін арам байлыққа қызықпа. Ана тіліңді сүй, құрметте. Оны қорғай біл. Алдыңа биік мақсаттар қой. Жақсы адамдардың жанында жүр, жақсылармен жолдас бол.
-Бақ, қайда барасың ?
-Береке-бірлігі жарасқан елге барамын!-деген екен.
Халқыңның бақыты береке-бірлікте екенін есіңде ұста. Қандай заманға тап болсаң да «қазақ»деген дана халықтың ұрпағы екеніңді ұмытпа!
Сайлауғайша Әлімбаева,
зейнеткер ұстаз, Қаз КСР білім беру ісінің үздігі 