Жан-жануарларға еліктеушілер. Дұрысы төрт аяқтының кейпіне еніп, тірлік кешіп жүрген жасөспірімдер көбейді. Бұл тик-ток әлеуметтік желісінен басталған жаңа тренд. Еліктеушілер қоғамдық орындарда көзге көп түсе бермегенімен, мегаполистерде арагідік бой көрсетіп жүр. Оны әлеуметтік желілерден байқап қаламыз. Содан кейін де қоғамның қызу талқысына түсті.
Қызығы, төрт тағандап жүруге әуестер мұны хобби санайды. Ұстанымын ата-анасы құптағандары да бар көрінеді. Солайша өмір салтына айналдырған. Еліктеуді ерсі көрмегендер маскасын өз қолдарымен жасап алып, ұнаған кейпіне ене кетеді. Желікпе жастардың ермегенінен пайда тауып жатқандар да бар. Оны сауда нүктелерінен аңғаруға болады. Қазір жануарларша жүріп-тұрамын дегендерге дайын бетперделер саудалануда. Квадробингке еліктейтіндер оның бағасына бас қатырмай, кәсіпкерлердің саудасын қыздырып жатқан көрінеді. Бүгінде жасөспірімдердің ғана емес, ересектер тарапынан да сұраныс артқан деседі.
Трендтің тик-токтан басталғанын айттық. Жалпы адамдардың төрт аяқтап жүруіне квадробика деген атау қайдан телінді? Тарихын тарқатсақ, квадробика, квадроберинг ұғымының түп тамыры Күншығыс еліне тартады. Бала күнінен төрт аяқтап жүруді әдетке айналдырған жапондық спринтер Кенити Ито итке еліктегендердің бастауы десек болады. Ол 100 метрге төрт тағандап жүгіріп, гиннестің рекордтар кітабына да еніпті. Жапон баласының осы жетістігіне таңырқағандар тренд қылса керек. Бастапқыда Жапония, кейін Америкада квадробикаға әуестенгендер қатары көбейе берген. Солай әлем айналған еліктеушілік әлеуметтік желі арқылы бізге де жетті.
Ал жат жақтан жеткен жастар хоббиіне қатысты психологтар пайымы сан түрлі. Оғаш қылыққа ойын балаларының уақытша әрекеті деп баға берген мамандар бар. Ерсі қылықпен айналысқан жеткіншек адами құндылықтардан алшақтай бастайды деп алаңдаушылық білдіргендер де аз емес. Әлеуметтік желіден тараған тренд баланың түп санасына тамырын жаймай тұрып, тез арада тоқтату керек деген пайым айтқандар да болды.
Қазақстан мұсылмандары діни басқармасының өкілдері квадроберлердің қылығын құптамайды. Ақпарат көздерінде жарияланған мүфтияттың мәлімдемесінде дініміз бен дәстүрімізде болмаған дүниені дәріптеу дұрыс емес екендігі айтылған.
Квадробиканың қаупі мәжілісте де айтыла бастады. Мәселен мәжіліс депутаты Дәулет Мұқаев өзінің депутаттық сауалында мәселеге маңыз берді. Мәжілісмен тіпті жануарларша жүргендердің әрекетін деградация деп дабыл қақты. Сондықтан депутат жануарлардың қимыл қозғалысын қайталағандарға қарсы күресті қазір бастап, жеткіншектердің желікпе қылығын заңмен тыюымыз керек деп санайды.
Қазір қоғам жаңа трендке баса назар салып отырған жоқ. Бірақ құйрық жабыстырып, бетперде таққандар төрт аяқтыға табынуларын жалғастыра берсе, кейін заң күшімен тәртіпке салудың өзі қиынға соғары анық.
Аружан Серікжанқызы,
Шәкәрім университетінің филология-
журналистика мамандығының
2 курс студенті