Ауған соғысы – ел тарихындағы қаралы парақтардың бірі. 10 жылға созылған сол зұлмат күндердің аяқталғанына 35 жыл болса да көңілдегі сыз тарқаған емес.
Бейбітшілік орнату мақсатында ұрыс іс-қимылдарына елімізден 22 269 жауынгер аттанған. Олардың 924-і жат жерде қалса, 1015 жас елге мүгедек болып оралды. 21 сарбаз іс-түзсіз жоғалды…
Иә, бұл біздің тарих. Өткенді өзгерте алмағанымызбен, интернационалист жауынгерлер ерлігін үлгі ете отырып, өскелең ұрпақты қайсарлыққа, отансүйгіштікке, төзімділікке тәрбиелей аламыз.
Бүгінде Бородулиха ауданында ауған соғысының 39 ардагері бар. Олардың бірі – Ержан Асанов.
1967 жылы Бородулихада өмірге келген Ержан Рымханұлы 1984 жылы орта мектепті бітірген. 18 жастағы өрімдей жас азаматтық борышын өтеу мақсатында Кеңес әскері қатарына алынып, Ауғанстанға аттанған.
— 1985-87 жылдары Ауғанстандағы Бадахшан өлкесінің Файзабад қаласында жүргізуші міндетін атқардым. Ұрыс даласында өңірімізден менен өзге жауынгер болмағанымен, қазақ жерінен барған қаруластарым көп болды. Ол кезде біздің күшімізді біріктірген жалғыз ой – Отанға адал қызмет ету болатын. Оқ пен оттың ортасында қатарластарымыздың қыршынынан қиылғанын, мертігіп, мүгедек болғанын көрдік. Соғыста өткерген қиыншылықтар әлі күнге дейін көз алдымда. Елге оралған соң да мемлекетімізді өркендетуге үлес қосуға тырыстық,- деді Бородулиха аудандық Ауған соғысы ардагерлері кеңесінің төрағасы Ержан Рымханұлы.
Елге оралған соң білім алып, төтенше жағдайлар бөлімінде еңбек еткен кейіпкеріміз 2016 жылы құрметті демалысқа шыққан. Сол кезде де, қазіргі таңда да ұстанатын жалғыз ұраны – Отанға адал қызмет ету.
«Ерлік ешқашан ұмытылмайды» демекші, жыл өткен сайын интернационалист жауынгерлерге деген құрмет артпса, кемімейді. Олар қай ортада болмасын, құрметті. Ауған соғысы ардагерлер кеңесінің мүшелері жастарды патриоттық рухта тәрбиелеуге үлес қосып жүр. Майданнан оралмаған сарбаздардың ата-аналарына да жәрдемдесіп, қол ұшын созуды ұмытқан емес.
— Ардагерлер кеңесінде бас қосып, пікір алмасамыз. Соғыс даласынан қайтпаған жауынгерлердің ата-аналарына көмектесуді қасиетті борышымыз санаймыз. Бақилық болған қаруластарымызды еске алып, рухына тағзым етеміз. Әр түрлі шаралар ұйымдастырамыз,- дейді Ержан Асанов.
Ардагерлерге мемлекет тарапынан жеңілдіктер мен жәрдемақылар, сауықтыру орындарына жолдама берілсе, жергілікті әкімдік жыл сайын бір реттік жәрдемақы тағайындайды. Бородулиха аудандық жұмыспен қамту және әлеуметтік бағдарламалар бөлімі басшысының айтуынша, былтыр жәрдемақы мөлшері 150 мың теңге болса, 2024 жылы 200 мың теңгеге тең. Интернационалист-жауынгерлерге қандай құрмет көрсетсек те артықтық етпейді, әрине.
Майдагердің айтуынша, шыбын жанды шүберекке түйіп, ертеңгі күнді үреймен қарсы алудан өткен қорқыныш жоқ. Бейбіт өмірдің құны өлшеусіз. Тәуелсіздік – ең қастерлі ұғым. Тек соны бағалай білу керек…
Әйгерім ЖАҚЫП
«Жаңа уақыт»