«Оқу – инемен құдық қазғандай» демекші, келешек жас ұрпақтың саналы болып қалыптасуы олардың білімге деген ізденісінің арқасында жүзеге асатыны анық.
Өмірдегі көп мамандықтардың ішінде жан-жақты білімділікті, икемділікті, шеберлікті, ерекше мейірімділікті қажет ететіні – ұстаздық мамандық. Білім беру кеңістігінде тәжірибелі де білімді, өз мамандығының хас шеберлері – кәсіби ұстаздар жетерлік. Солардың бірі – Әлихан Бөкейхан атындағы қазақ орта мектебінің мұғалімі Бейбітгүл Еркінғазықызы Ахметжанова. Ұзақ жылдар бойы ұстаздықтың ұлы жолында өзінің айшықты еңбегімен дараланған Бейбітгүл Еркінғазықызы жайлы ерекше ілтипатпен айтуға болады.
Нағыз ұстаз болу – бақыт әрі абырой. Шындығында, мұғалім болу оңай болып көрінгенмен, ал нағыз ұстаз болу екінің бірінің қолынан келе бермесі анық. «Ұстазды алтын діңгекке теңер едім», – деп ұлы педагог Ы. Алтынсарин айтқандай, ұстаз жолы – қиыншылығы мен рахаты бір басқа жетерлік мамандық атаулының ұлысы.
Бейбітгүл Еркінғазықызы Ахметжанова Абай облысының Тарбағатай ауданындағы Өйшілік ауылында 1986 жылы, көктемнің шуақты күні 25 наурызда дүниеге келген. Ұстаздық жолда жүруді бала кезінен армандаған ол сол арманының жетегіне еріп, 11-сыныпты тәмәмдаған соң, Семей қаласындағы «М. Әуезов атындағы Семей университетіне» бастауыш сынып мұғалімі мамандығына оқуға түседі. Университетті 2007 жылы аяқтайды. Оқуын бітіргеннен кейін жас маман өзінің еңбек жолын Бородулиха ауданының Әлихан Бөкейхан атындағы қазақ орта мектебінен бастайды. Сол жылдардан бері осы мектепте ұстаздық жолын үздіксіз жалғастырып келеді.
Осылайша, үлкен жауапкершілік жүктейтін ұлы мамандыққа ынтыға кірісіп, еңбек етіп келе жатқанына да 15 жылдай уақыт болыпты. Ауыры мен жеңілін, шуағы мен дауылын қатар тосқан ұстаздық жолда түйген пәлсапалық ұстанымы – үнемі жаңашылдыққа ұмтылып, алдыңғы қатардан көріну және әр оқушының бойынан жақсылық тауып, бұлақтың көзін ашу арқылы биік мақсаттарға жетелеу. Сондықтан да болар, педагогикалық шеберлікке талпыну мен өз ісіне асқан жауапкершілікпен қарау оны басқа әріптестерінен ерекшелеп тұрады.
Ол «Оқытудың жаңа педагогикалық технологияларын пайдалана отырып, оқушылардың шығармашылық қабілеттерін дамыту» өзекті тақырыбын басшылыққа алады. Оқу үдерісінде 7 модульдің элементтерін ықпалдастыра және аймақтық компонентті пайдалана отырып, сабақтарын тартымды да қызықты өткізеді. Үнемі шығармашылық ізденісте. Педагогикалық тәжірибесін ұштау мақсатында жүйелі түрде біліктілігін көтеріп, кәсіби конкурстар мен ғылыми-тәжірибелік конференцияларға қатысады.
Бейбітгүл Еркінғазықызының жетістіктері өте көп. Оның әр жылдары бағындырған белестеріне шәкірттерінің жеткен жетістіктері дәлел бола алады. Мәселен, 2019 жылы аудандық пәндік олимпиадада қазақ тілі пәнінен оқушысы Толғанай Орынхан үшінші орынды иемденеді. Сол жылы 1-7 сыныптар арасында өтетін «Зерде» ғылыми жобасы бойынша аудандық, облыстық, республикалық кезеңдерден Ислам Аманбаев «Қазақтың ұлттық бұйымы торсықты әзірлеу және тері торсықты заманауи пластикалық бір реттік қолданыстағы ыдыстармен салыстыру» атты жобасын қорғап бірінші орынды иемденді.
2019 жылы бастауыш сынып оқушыларына арналған «Бастау» республикалық математикалық турнирінің облыстық кезеңінде «Асық» номинациясы бойынша Ислам Аманбаев пен Әлихан Кабиденов екінші орынды еншіледі. Сол жылы Бейбітгүл Еркінғазықызының өзі «Заманауи білім беру жүйесі: өткеннен тәжірибе – болашаққа бағдар» атты облыстық педагогикалық оқуларында бірінші орынды иемденді.
2020 жылы 1-7 сыныптар арасында өтетін «Зерде» ғылыми жобасынан аудан бойынша бірінші орынға, облыстық кезеңнен үшінші орынға табан тіреген Ақнұр Оразғалиева «Қызанақ өсірудегі жұмыртқа қабығының пайдасы» атты жобасын сәтті қорғап шықты.
2020 жылы Бейбітгүл Еркінғазықызының оқушысы Ислам Аманбаев аудан әкімі О. Булавкинаның және 2021 жылы облыс әкімі Даниал Ахметовтың «Құрмет грамотасымен» марапатталды.
Сонымен қатар Бейбітгүл Еркінғазықызы 2021 жылы республикалық «Дарын» орталығының басшысы А. Боранбайдың «Құрмет грамотасына» ие болды. 2022 жылы «Білім өркениетінің» ұйымдастыруымен өткен «Үздік ғылыми жоба – 2022» атты республикалық конференцияда бірінші дәрежелі дипломмен марапатталып, төсбелгі тақты. Сол жылы Бейбітгүл Ахметжанова Ахмет Байтұрсынұлы атындағы республикалық педагогикалық олимпиадада үшінші орынды еншіледі.
Ұстаз үшін биылғы 2023 жыл да нәтижелі басталды. Бастауыш сынып мұғалімдеріне арналған «Алтын тұғыр» математикалық олимпиадасының өңірлік кезеңінен 156 ұстаздың ішінен топ жарды, нәтижесінде, бірінші орынды жеңіп алып, республикалық кезеңге жолдама алды. Республикалық кезеңде мектебінің, ауданның, облыстың үмітін ақтап, 153 ұстаздың ішінен жүлделі үшінші орынды еншіледі. Қазіргі таңда ол өзге де ұстаздарға үлгі болып, әріптестеріне жол көрсетіп келе жатыр.
Бейбітгүл Еркінғазықызы ұстаз ғана емес, отбасының ұйытқысы, сүйікті жар. Үш ұл, бір қызды тәрбиелеп отырған аяулы ана.
Әр ұстаз XXI ғасыр мұғаліміне сай болу үшін ізденімпаз ғалым, нәзік психолог, жан-жақты шебер, тынымсыз еңбекқор, терең қазыналы білімпаз, кез-келген ортаның ұйытқысы болуы қажет. Тек мықты ұстаз ғана осындай ауыр жүкті алып жүре алады.
Бейбітгүл Ахметжанованың танымы өте жоғары, демек, білімді, дарынды, шәкірттеріне талап қоя білетін, өз ісіне шығармашылықпен қарайтын, әрқашан ізденісте жүретін педагог әрі шебер ұйымдастырушының алар асулары, шығар белестері әлі де алда. Мұндай ұстаз болашақта мықты шәкірттерді тәрбиелеп шығаратынына сеніміміз мол.
Серік Тілекұлы